Өлкөнү эки облусундагы сугат тармагын өнүктүрүүгө 59,5 млн доллар өлчөмүндө каражат алынат

03-09-2020 11:21

Жогорку Кеңеште «Бишкек шаарында 2020-жылдын 11-июнунда кол коюлган Кыргыз Республикасы менен Сауд өнүктүрүү фондунун ортосундагы “Исык-Көл жана Нарын облустарындагы сугат жерлерин иштетүүнү өнүктүрүү” долбоору боюнча зайым жөнүндө макулдашууну ратификациялоо тууралуу» мыйзам долбоору каралып, баардык фракциялардын макулдугу менен дароо эле үч окууда добуш берүүгө жөнөтүлдү.

Ысык-Көл жана Нарын облустарындагы сугат суу тармагын өнүктүрүүгө багытталган «Ысык-Көл жана Нарын облустарындагы сугат айыл-чарбасын өнүктүрүү» долбооруна жалпысынан 59,5 млн доллар бөлүнөт, долбоорду ишке ашыруу мөөнөтү – 5 жыл. Анын ичинде, Ислам өнүктүрүү банкынын каражаты – 20 млн доллар. Жеңилдетилген насыя 25 жылдык мөөнткө 1,5 пайыздык үстөгү менен берилүүдө.

Ысык-Көл жана Нарын облустарындагы сугат айыл-чарбасын өнүктүрүү» долбоорун ишке ашыруунун экинчи этабында Сауд фонду 30 жылдык мөөнөткө 0,75 пайыздык үстөгү менен 30 млн доллар өлчөмүндө жеңилдетилген насыя бөлөт. Ал эми Кыргызстан долбоорго 8,9 млн доллар кошууга тийиш.

Айыл чарба министринин орун басары Жаныбек Керималиевдин айтымында, долбоордун биринчи этабында Ысык-Көл облусунун Жети-Өгүз жана Тоң райондорунда, Нарын облусунун Кочкор районунда жаңы сугат объектилери курулат. Андан тышкары, Үч-Коргон, Шамшы, Түгөл-Сай сууларында 4 суу сактагыч курулууга тийиш.

Ошондой эле, талкуу жүрүшүндө долбоорду ишке ашыруу жаатындагы консультанттар негизинен жергиликтүү адистер тартыла турганы белгилүү болду.

 

Жогорку Кеңештин Басма сөз кызматы

Көрүүлөрдүн саны : 3673

Окшош жаңылыктар