Шрифттин өлчөмү:
А-
А
А+
Түстөр:
А
А
А
Сүрөттөр:
Өчүрүү
Кадимки версия

Сулайманкул Атакулов, Тыныбек Бекешов, Аида Сейдакматова Жогорку соттун судьялыгына шайланышты

20-10-2021
12:24

Жогорку Кеңештин жыйынында Кыргыз Республикасынын Жогорку сотунун судьялыгына көрсөтүлгөн Атакулов Сулайманкул Солтонкуловичтин, Бекешов Тыныбек Рахманбердиевичтин, Сейдакматова Аида Асанбековнанын талапкерлиги каралды. Аларды депутаттарга Президенттин Жогорку Кеңештеги ыйгарым укуктуу өкүлү Анарбек Калматов тааныштырды.

Жабык электрондук добуш берүү жыйынтыгында депутаттардын басымдуу бөлүгүнүн добушу менен Сулайманкул Атакулов, Тыныбек Бекешов, Аида Сейдакматова Кыргыз Республикасынын Жогорку сотунун судьялыгына шайланышты.

Андан тышкары, жаңыдан шайланган судьялар парламентте ант беришип, расмий түрдө өздөрүнүн ыйгарым укуктарын аткарууга киришишти.

Жогорку Кеңештин Төрагасы Талант Мамытов жалпы депутаттардын атынан Сулайманкул Атакуловду, Тыныбек Бекешовду, Аида Сейдакматованы эл өкүлдөрүнүн ишенимине ээ болушу менен куттуктап, алардын ишинде ийгиликтерди каалоо менен бирге, аларды өз ишине жоопкерчилик менен карап, мыйзам алкагында калыс чечимдерди чыгарууга чакырды.

Белгилей кетсек, Жогорку Соттун судьясы парламентте ант берген соң, расмий түрдө өзүнүн ыйгарым укуктарын аткарууга киришет.

 

Жогорку Кеңештин Басма сөз кызматы