Шрифттин өлчөмү:
А-
А
А+
Түстөр:
А
А
А
Сүрөттөр:
Өчүрүү
Кадимки версия

Социалдык комитет кезектеги жыйынын кыргыз-тажик чек арасындагы куралдуу конфликтте курман болгон жарандарды эскерүү менен баштады

19-09-2022
11:03

Бүгүн, 19-сентябрда Жогорку Кеңешинин Социалдык саясат боюнча комитети кезектеги жыйынын мамлекеттик чек аранын кыргыз-тажик тилкесиндеги куралдуу конфликтте курман болгон жарандарды эскерүү менен баштады.

Төрайым Винера Раимбачаева “Тармактык комитеттин атынан мекен чегинде  курман болгон жарандарыбыздын үй-бүлөсүнө, ата-энелерине жана ага-туугандарына терең кайгыруу менен көңүл айтабыз”, – деди.

Белгилей кетсек, Президент Садыр Жапаров кол койгон жарлыкка ылайык, 2022-жылдын 19-сентябры Кыргыз Республикасында улуттук аза күтүү күнү деп жарыяланган.

Андан соң комитет мүчөлөрү чек арадагы жаңжалда жабыркагандарга керектүү медициналык жардамдарды көрсөтүү, зарыл болгон дары-дармектерди убагында жеткирүү боюнча маселелерди көтөрүштү.

Өз кезегинде Дары-дармек жана медициналык техника департаментинин директору Нурдин Кагаздиев бардык керектүү дары-дармектер жетиштүү экенин белгиледи.

Ал эми депутат Надира Нарматова кыйын кырдаалда чек арачылар менен катар кызмат кылган ак халатчандарга ыраазычылык билдирип: “Эмне жардам керек болсо айткыла. Биз, Жогорку Кеңеш өз ыйгарым укуктарыбыздын алкагында чечкенге аракет кылабыз”, – деди.

Ошондой эле депутат Айбек Маткеримов Финансы министрлигинин өкүлүнө кайрылып: “Өзгөчө кырдаалдарда кошумча каржылоо мүмкүнчүлүгү барбы? Маселен, керектүү медициналык каражаттарды алуу багыттында” – деп сурады.

Финансы министрлигинин  өкүлү өтө зарыл болгон сунуштардын бардыгы каралып жатканын айтып, керек болсо берилерин кошумчалады.

Коомчулук жана ЖМК менен иштөө бөлүмү