Шрифттин өлчөмү:
А-
А
А+
Түстөр:
А
А
А
Сүрөттөр:
Өчүрүү
Кадимки версия

Тармактык комитетте мектепке чейинки жана мектептик билим берүү чөйрөсүндөгү иштин абалы талкууланды

19-09-2022
11:58

Бүгүн, 19-сентябрда Жогорку Кеңешинин Социалдык саясат боюнча комитетинин кезектеги жыйынында депутаттар Кыргыз Республикасындагы мектепке чейинки жана мектептик билим берүү чөйрөсүндөгү иштин абалы жөнүндө Кыргыз Республикасынын Билим берүү жана илим министринин маалыматын угушту.

Аталган маселе боюнча маалымат берген билим берүү жана илим министринин орун басары Надира Жусупбекова 2022-жылдын 1-жарым жылдыгында бала бакчалардын саны 64кө көбөйүп, учурда 1712 бала бакча иштеп жатканын билдирди.

“Андан тышкары, ата-энелер үчүн да программалар иштелип чыгып, керектүү жумуштар жасалууда. Мектептер үчүн билим берүүнүн жаңы стандарттары киргизилүүдө”, – деди министрдин орун басары.

Ошондой эле Баткендеги кырдаалдан жабыркаган билим берүү жайлары тууралуу да сөз кылган Надира Жусупбекова: “Баткен районундагы сегиз мектеп жана бир бала бакча ар кандай деңгээлде жабыркады. Андыктан аталган мектептерде дароо окуу процессин баштоо мүмкүн эмес. Ал эми Лейлек районундагы чек арага чектеш айылдардагы 26 мектеп менен 30 бала бакчанын иши токтоп турат. Канчасы жабыркаганы такталууда”, – деди. Муну менен катар Кадамжай районундагы, Сүлүктү шаарындагы билим берүү мекемелерине эвакуацияланган эл жайгаштырылганын белгиледи.

Талкуу маалында депутат Айбек Маткеримов мектептерде баштапкы аскердик даярдоо сабагын окутууга өзгөчө көңүл бурулушу керектигине токтолду.

Өз кезегинде министрдин орун басары 10-11-класстын окуучуларына жумасына эки жолу аскерге чейинки даярдык сабагы өтүлөрүн маалымдап: “Бирок Баткен облусундагы мектептерге аталган сабакты жөнөкөй мугалим эмес, аскер кызматкери өтсө деген сунуш бергенбиз”, – деди.  

Ал эми депутат Надира Нарматова 12 жылдык билим берүүнүн канчалык зарылчылыгы бар экенин сурап: “Бул ата-энелердин, жергиликтүү билим берүү мекемелеринин сунушубу же кимдер бирөөнүн жекече кызыкчылыгыбы? Анткени, көпчүлүк жолугушууларда тургундар бул демилгени каалабагандыктарын айтышууда”,– деди. Муну менен катар билим берүү тармагында жасалып жаткан реформалар боюнча пикирин билдирди.

Бул демилгенин максаты дүйнөлүк билим берүү системасы менен Кыргызстандын билим берүү системасын айкалыштыруу экенин айткан министрдин орун басары: “Анткени, дүйнөнүн 156 өлкөсү 12 жылдык билим берүү моделине өткөн. Ага ылайык, бизде да 12 жылдыкка өтүү боюнча жол картасы белгиленип, керектүү анализдер жүргүзүлүп жатат” – деди.

Мындан тышкары, депутат Шайлообек Атазов Баш мыйзамда билим берүү бекер деп айтылганы менен мектептерде акча чогултуу токтобой жатканын белгилеп, тармактагы системалашкан коррупциялык көрүнүштөрдү жоюу зарылчылыгын кошумчалады.

Жыйын соңунда берилген маалыматтар боюнча тийиштүү токтом долбоору жактырылды.

Коомчулук жана ЖМК менен иштөө бөлүмү