Шрифттин өлчөмү:
А-
А
А+
Түстөр:
А
А
А
Сүрөттөр:
Өчүрүү
Кадимки версия

«Кыргыз Республикасынын 2020-жыл үчүн республикалык бюджетинин аткарылышы жөнүндө отчетту бекитүү тууралуу» мыйзамдын долбоору добуш берүүгө жөнөтүлдү

23-06-2022
13:02

Бүгүн, 23-июндагы Жогорку Кеңештин жыйынында «Кыргыз Республикасынын 2020-жыл үчүн республикалык бюджетинин аткарылышы жөнүндө отчетту бекитүү тууралуу» мыйзамдын долбоору экинчи окууда каралды. Демилгечи – Министрлер кабинетинин Төрагасы.

Жыйында аталган маселе боюнча баяндама жасаган Бюджет, экономикалык жана фискалдык саясат боюнча комитеттин төрагасы Данияр Төлөнов белгилегендей, Эсеп палатасы Кыргыз Республикасынын 2020-жыл үчүн республикалык бюджетинин аткарылышына аудит жүргүздү. Текшерүүнүн жыйынтыгы боюнча 22 пункттан 7 иш-чара аткарылды, 4 жарым-жартылай аткарылды, анын ичинде бюджетке калыбына келтирүү бөлүгүндө 22 млрд 373 млн сомдун ичинен 17 млрд 448 млн сом калыбына келтирилди.

Алсак, Башкы прокуратура тарабынан аныкталган мыйзам бузуулар боюнча «Кумтөр Голд Компани» ЖАКтан алынган 4 млрд 915,7 млн сом максатсыз пайдалануу боюнча иштер каралып жатат. Талкуунун жүрүшүндө депутаттар бул каражаттарды калыбына келтирүү маселесин көтөрүштү. Ага Каржы министрлиги 2023-2026-жылдар аралыгында фонддун каражаттарын калыбына келтирүү боюнча иштерди пландап жатканы айтылды.

Ал эми депутат Мирлан Самыйкожо 2019 жана 2020-жылдардагы бюджеттин киреше бөлүгүнө кызыкты. Каржы министрлигинин башчысы Алмаз Бакетаев 2020-жылы киреше 134,5 млрд сомду, 2019-жылы болсо 148,4 млрд сомду түзгөнүн белгиледи. Эл өкүлү Арсланбек Малиев консолидацияланган бюджеттин динамикасын тактады. Депутат Алишер Эрбаев Ала-Бука райондук өнүктүрүү фондунан Жалал-Абад облусун өнүктүрүү фондуна 230 млн сом мыйзамсыз которулганын белгиледи. Ошондой эле, депутаттар кредиттик каражаттын өздөштүрүлбөгөнү боюнча козголгон кылмыш иштери тууралуу да суроолорду беришти.

Талкуунун жыйынтыгында мыйзам долбоору экинчи окууда добуш берүүгө жөнөтүлдү.

Коомчулук жана ЖМК менен иштөө бөлүмү