Дыйкандарга жеӊилдетилген насыялар 10 пайыздуу үстөгү менен 36 айлык мөөнөткө берилүүдө

Айыл чарба министрлиги Ирандын 1000 тонна этке тапшырыгын аткара албайт. Бул тууралуу министр Нурбек Мурашев Жогорку Кеӊештин Бюджет жана финансы боюнча комитетинде 2016-жылы “Айыл чарбаны каржылоо-4» долбоорунун ишке ашыруунун натыйжасы жөнүндө жана 2017-жылга “Айыл чарбаны каржылоо-5» долбоору тууралуу маалымат угулуп жатканда билдирди.

Министрдин айтымында, мынчалык көлөмдөгү этти даярдоого кыргыз тараптын мүмкүнчүлүгү жок. «2016-жылы Кыргызстан 13 млрд сомдук айыл чарба өнүмдөрүн экспорттогон, ал 2015-жылга караганда 3 млрд сомго көптүк кылат. Азыр бизде айыл чарба өнүмдөрүнүн тартыштыгы жок», - деди ал.

Ал эми каржы министри Адылбек Касымалиев быйыл “Айыл чарбаны каржылоо-5» программасы ишке киргизиле турганын белгиледи. 2010-жылдан тарта ишкердиктин 53 субъектиси 17 млрд сомго каржыланды. Өткөн жылы “Айыл чарбаны каржылоо-4» долбоорунун алкагында айыл чарба өнүмдөрүн өндүрүүчү 13 субъект 4,8 млрд сомго каржыланды.

Белгилей кетсек, жеӊилдетилген насыялар 10 пайыздуу үстөгү менен 36 айлык мөөнөткө берилүүдө.

КР ЖК Басма сөз кызматы