Бишкек шаарында ачыла турган кыргыз-түрк ооруканасын эки тарап 3 жыл биргелешип башкарат, андан кийин аны башкаруу укугу кыргыз тарапка өткөрүлүп берилмекчи

14-03-2019 17:53

Жогорку Кеӊеште КР Өкмөтү менен Түркия Өкмөтүнүн ортосундагы Бишкек шаарында мамлекеттик кыргыз-түрк достугу ооруканасын ачуу, биргелешип башкаруу жана өткөрүп берүү, ошондой эле кыргыз жарандарынын медицина жана медициналык адистиктер чөйрөсүндө Түркияда билим алуусу жөнүндө макулдашуу жөнүндө ратификациялык мыйзам долбоору каралып, анын концепциясы добуш берүүгө жөнөтүлдү.

Баяндамачынын айтымында, макулдашуунун алкагында Бишкек шаарында ачыла турган кыргыз-түрк ооруканасын эки тарап 3 жыл биргелешип башкарат, андан кийин аны башкаруу укугу кыргыз тарапка биротоло өткөрүлүп берилет. Өткөрүлүп берилгенден кийинки 3 жыл аралыгында Түркиянын Саламаттык сактоо министрлиги тарабынан мониторинг жана координациялоо жумуштары жасалып турат. Медициналык мекемеде жарандарга кызмат көрсөтө турган 72 жатак орун болот.

Макулдашууда мамлекеттик саламаттык сактоо уюмдарын башкаруудагы жана каржылоодогу жаңы принциптер менен программаларды өткөрүп берүү, жыл сайын 20 кыргыз дарыгерин Түркияда окутуу мүмкүнчүлүгү да каралган. Стипендиант-студенттер Ченөө, тандоо, жайгаштыруу борбору тарабынан тандалып, алардын саны эки тараптын ортосунда сүйлөшүлгөн кошумча келишимдердин негизинде аныкталмакчы.

Андан тышкары, Түркия эки тараптуу келишимде камтылган чараларды ишке ашыруу максатында, кошумча 15 млн доллар көлөмүндө гранттык каражат бөлө турганы белгилүү болду. Саламаттык сактоо министри Космосбек Чолпонбаевдин айтымында, кыргыз-түрк ооруканасында иштеген түрк адистери менен кыргыз дарыгерлеринин эмгек акысы жогору болот.

Министр ушу тапта кыргыз-түрк ооруканасынын курулушу аяктап калганын, зарыл болгон заманбап медициналык жабуулар келип жатканын, үчүнчү деӊгээлдеги заманбап оорукана ушул жылдын ичинде ачыла турганын билдирди. Ал келишимди ратификациялоо жол-жоболорун тездетүү зарылдыгын, келишим жакын арада түрк парламенти тарабынан да ратификациялана турганын кошумчалады.

Депутат Элвира Сурабалдиева министрден кыргыз-түрк достугу ооруканасы мамлекеттик деп аталганы менен, оорулуулар акы төлөп дарылана турган медициналык мекеме болорун жаап-жашырбай ачык айтууну талап кылды. Министр мурдагы келишимде чындыгында эле ушундай шарттар болгонун, бирок акыркы сүйлөшүүлөрдүн негизинде келишимге бир катар өзгөртүүлөр киргизилгендиктен, жарандарыбыз ооруканада акысыз дарылана турганын билдирди.

 

Жогорку Кеӊештин Басма сөз кызматы

Көрүүлөрдүн саны : 1591

Окшош жаңылыктар