Азия өнүктүрүү банкы калктын климаттык өзгөрүүлөргө жана кырсык коркунучтарына туруктуулугун бекемдөө багытында насыялык каражат бөлөт

13-06-2019 16:13

Жогорку Кеӊеште Кыргыз Республикасы менен Азия өнүктүрүү банкынын ортосундагы “Климаттын өзгөрүүсүнө жана табигый кырсыктарга суу ресурстарынын туруктуулугун күчөтүү” боюнча Кредиттик жана Гранттык макулдашуулар боюнча ратификациялык мыйзам долбоору каралып, анын концепциясы добуш берүүгө жөнөтүлдү.

Келишимге ылайык, Азия өнүктүрүү банкы калктын климаттык өзгөрүүлөргө жана кырсык коркунучтарына туруктуулугун бекемдөө максатында Кыргызстанга каражат бөлөт. Долбоордун жалпы бюджети – 43,6 млн доллар, Азия өнүктүрүү банкынын каражаты – 38,6 млн доллар, анын ичинде гранттык каражат – 16,8 млн доллар, жеӊилдетилген насыя каражаты – 21,8 млн доллар. КР Өкмөтү долбоорго 5 млн долар кошот. Насыя 32 жылдык мөөнөткө 1 пайыз үстөгү менен берилүүдө.

Долбоор 3 бөлүктөн турат: Ирригациялык инфратүзүмдөрдү модернизациялоо, Ирригация тутумун жана айыл чарба жерлерин башкарууну жакшыртуу, Табигый кырсыктардын коркунучтарын улуттук деӊгээлде башкаруу боюнча мүмкүнчүлүктөрдү бекемдөө. Андан сырткары, долбоордун консультанттары жергиликтүү адистерден тандалып алынары, анын алкагында 200 чакырым суу каналы калыбына келтириле турганы белгилүү болду.

Депутат Акылбек Жапаров буга чейин алынган 10 млрд доллардан ашуун насыя каражаттарынын ушул кезге чейин дайыны табылбай жатканын эске салып, бул жолку насыя ким тарабынан төлөнө турганына кызыкты. Каржы министринин орун басары Мирлан Байгончоков 21,8 млн насыя каражат толугу менен Өкмөт тарабынан төлөнө турганын билдирди.

Ал эми Айыл чарба министринин орун басары Жаныбек Керималиев, донорлор оӊдоло турган каналдарды сунуш кылынган 12 каналдын ичинен тандап алышарын айтты. «Долбоордо күтүлбөгөн чыгымдарга 3,9 млн доллар каралды. Баардык эле долбоорлор ишке ашырылып жатканда, кайсы бир багытта каражат тартыш болуп калат. Ошондон улам, күтүлбөгөн чыгымдарга атайын каражат каралат», - деди ал.

 

Жогорку Кеӊештин Басма сөз кызматы

Көрүүлөрдүн саны : 2032

Окшош жаңылыктар